Bibitäç Nyýazowa 4

Türkmen döwlet gurjak teatrynyň  yokary derejeli artisti

Bibitäç  Gutlyýewna  Nyýazowa 1967-nji ýylda  Ahal  welaýatynyň  Kaka  etrabynda  doguldy. Onuň  kalbynda  sungat  älemine  bolan  höwes  çagalyk  ýyllarynda  döredi. Ol  gurjaklaryny  edil  teatr  sahnasynda  ýaly  oýnatmagy  gowy  görýärdi. Ol orta mekdebi tamamlandan soňra, 1984-1988-nji ýyllarda Daşkent şäherindäki A.N.Ostrowskiý adyndaky teatral-sungat institutynda  bilim  alyp  kino we drama teatrynyň aktýory hünärine eýe boldy. 1988-1989-njy ýyllarda Ahal welaýatynyň Kaka etrabynyň Medeniýet öýünde işläp, birnäçe sahna oýunlaryna gatnaşdy. 1989-1997-nji ýyllar aralygynda Türkmen döwlet eksperimental ýaşlar teatr studiýasynda artist wezipesinde işleýär. Bu  teatrda  işlän  döwründe  dürli  ýurtlarda – Moskwada, Kanadada, Ankarada, Belgiýada  geçirilen  halkara  teatr  festiwallaryna  gatnaşyp, “Däli  Domrul”, “Jan” atly  oýunlarda  çykyş  etmek  miýesser  edýär.

1997-2000-nji ýyllar aralygynda Türkmen döwlet satira teatrynda işläp, teatryň sahnasynda goýulan gülküli oýunlarda degişmeli keşpleriň birnäçesini döredýär.

2001-2007 –nji ýyllarda Türkmenistanyň Magtymguly adyndaky sazly drama teatrynda artist wezipesinde işlän döwründe „Gelsene, Täze ýyl!“ „Akpamyk“, „Etme, oglan sen oýun“, „Hazyna“, „Agzybirlik ýylysydyr ojagyň“ ýaly  oýunlarda  dürli  keşpleri ussatlyk bilen ýerine ýetirdi.

2007-nji ýyldan şu wagta çenli Türkmen döwlet gurjak teatrynda ýokary derejeli artist wezipesinde döredijilik ýoluny dowam edýär. Kiçi we uly ýaşly tomaşaçylaryň söýgüsini gazanan Bibitäç Nyýazowa birnäçe keşpleri  janlandyrdy. G. Daňatarowyň “Gurjakgyz” oýnunda  Aýjemalyň, H. Şirowyň “Ýartygulak” oýnunda  Enäniň, G. Daňatarowyň “Söýgi  bizi  halas  eder” oýnunda  Tumaryň, döredijilik  toparynyň “Jüýteniň  toýy” oýnunda  Totynyň,  döredijilik toparynyň “Çagaly öý bazar” oýnunda Totynyň, G. Daňatarowyň “Gurjakgyz” oýnunda Nabadyň, keşplerini  ussatlyk  bilen  ör  boýuna  galdyryp, tomaşaçylaryň  göwnünden  turmagy  başardy.